თარგმანი გ. ხასაია ვ. ნაცვლიშვილი

შენ უნდა ისურვო,

შენ უნდა იყო სასურველი,

შენ არ შეგიძლია თამაში დატოვო

თუ გაჩერდები, არსებობას შეწყვეტ.

 

მოვიდა დრო,

საუბრის თემა შევცვალოთ.

დროს ჩამორჩი,

რეალობის შენეული მოდელი მოძველდა,

შეუძლებელია იფიქრო ,როგორც ადრე .

ახალი დრო დადგა.

 

ლოდინის დრო აღარ არის,

მოქმედების დროა,

დროა, შეიძინო სპეციალურად შექმნილი

გადაადგილების საშუალებები.

შექმნილი სპეციალურად მათთვის,

ვისაც არსად აქვს წასასვლელი,

მაგრამ მაინც სადღაც ეჩქარება.

იგრძენი დრაივი,

სხვა გრძნობის თავი მაინც არა გაქვს

აბა დაფიქრდი, სხვა რა უნდა აკეთო.

 

კავშირი უფრო ადვილი ხდება,

როცა არც არავისთან გსურს დაკავშირება,

მაგრამ დარჩი ხაზზე,

იქნებ, მოულოდნელად რამე ანგარიში,

ან სარეკლამო პროსპექტი გამოგიგზავნონ.

 

რეკლამა მართლაც გვეხმარება,

საქონლის სამყაროში სწორად გავერკვეთ,

თუმცა ის უკვე გამოუსადეგარია

ამ სამყაროს დატოვებისთვის.

მაგრამ ესეც არაა ცოტა.

 

რა გემართება,

მიიღე ორმაგი სიამოვნება-

თუნდაც საკუთარი

ზედაპირზე მიმოფანტული ნება-სურვილის

ატროფიის ხარჯზე.

კარგი ემოციები გარანტირებული გაქვს-

სრული მოცულობით, ნაყიდი ბილეთის

კატეგორიის შესაბამისად.

 

ბოლო-ბოლო მოიყვანე მეგობრები,

მიიღე კუპონი.

 

2.

მხოლოდ ამ სამყაროში თუ იარსებებს

ცენტრების ქსელი.

 

ისტორიის მიღმა მყოფი აბონენტების

გარანტირებული მომსახურების

ცენტრების ქსელი.

 

ჭეშმარიტად განტოტვილია

სავაჭრო-გასართობი კომპლექსების ქსელი-

ნამდვილი მამაკაცებისთვის – კასტრაციის კომპლექსი,

მშვენიერი ქალბატონებისთვის – პენისის შური,

ყველაზე პატარებსაც კი მოვუმზადეთ რაღაც.

არავინ მოიწყენს.

 

თუ სხვაგან უფრო იაფად იპოვი,

არ მოგერიდოს, მოდი,

ფულს დაგიბრუნებთ,

დაგიბრუნებთ კარგ განწყობას,

ფასდაკლების მოლოდინში გატარებულ

ახალგაზრდობას დაგიბრუნებთ.

მაგრამ გვეეჭვება, უფრო იაფად სადმე იპოვო.

 

და საერთოდაც, მიაქციე ყურადღება,

რამდენი რამეა აქ უფასოდ.